Palermu, 28 novembre 2005

Sta simana vi vulemu parrari d’un fattu chi ni capitò sabatudìa passatu e chi ni parsi veru mpurtanti. Ci fussi quasi di rìdiri si, in un certu senzu, ‘un ci fussi ‘i chiànciri…

Un nostru amicu (picchì lu cunzidiramu tali, nonostanti tuttu), l’onorèvuli Sammartino, ni mmitò a la naugurazioni di lu so cursu di “Studi Politici e Culturali” chi si tinìa a lu Tiatru “Biondo” di Palermu (chiù pricisamenti mmitò lu prufissuri Costa chi è unu di li nostri militanti stòrichi d’in Palermu).

Siccomi, puru ca nun appartinemu a lu partitu di Sammartinu, li so idei pàrinu li nostri pricisi, lu so Manifestu pi la Sicilia e la so dichiarazioni supra a “La Sicilia chi vulemu”, pàrinu livati pricisi di li nostri cumunicati e di la nostra Carta, ci jamu cu granni piaciri, e no sulu lu prufissuri mmitatu, ma cincu di nùautri, ntra cui Michele Santoro, lu coordinaturi rigiunali di L’Àutra Sicilia.

Àutri voti avìamu jutu a parrari a li picciotti di Sammartinu: l’annu passatu a Palazzu Steri, du’anni fa a Gibilmanna. Ni parìa na cosa normali putiri salutari chidhi novi, macari cincu minuti,… Tutti nna stu ncontru avìssiru avutu a parrari: lu Prisidenti Cuffaru, Capodicasa, Lo Porto, Nania e àutri (di tutti chisti chi dìssimu nun ni vinni mancu unu) – tutti menu di nuàutri, l’ùnichi chi ci tennu pi daveru a sta biniditta Autonomìa e sta identitati di lu Pòpulu Sicilianu.

Ma lassamu pèrdiri chistu…

La manifestazioni, certu, arriniscìu… Âm’a diri ca pruvamu na granni mozioni a vìdiri tuttu dhu tiatru chinu chinu di Banneri Siciliani, a vìdiri tuttu dhu tiatru chinu chinu di picciotti e di citatini cumuni chi cridèvanu veramenti a li Valori di la Nostra “Piccola Grande Patria”, … ‘un c’è chì diri…

Certu, li pulìtichi nun vìnniru, forsi lu fìciru di propòsitu, … c’era sulu menza currenti di lu partitu di Sammartino stissu e nudhu chiù… ma a chissu ci semu abituati: a Mazara, quannu fìcimu la Festa di l’Autonomìa, l’ùnichi ca nun vòsiru vèniri foru propiu li pulìtichi, chi si scàntanu sempri quannu c’è n’idea nova chi minazza lu so putiri.

Forsi nun vìnniru pi cunnannari a Sammartinu chi ni detti mpurtanza cu la custioni di la MSC Crociere: “Còmu si purmisi stu picciuttedhu a parrari di L’Àutra Sicilia a li giurnali e a l’Assemblea Rigiunali Siciliana? Ora ci facemu vìdiri nuàutri facennu finta ca idhu nun esisti…”.

Comu fu comu non fu, lu fattu è ca Sammartinu nun ni fici parrari… Ni vosi fari vèniri sulu p’abbattìricci li manu… E nùautri, c’un semu ntintari, ci l’abbattemu…

Ma ni siddiamu macari! A lu prufissuri ci dissi ca “non era previsto” lu so salutu, ma ca ci avissi pinzatu idhu, di lu palcu, a ricurdari e a salutari L’Àutra Sicilia.

Nuàutri èramu ddha!

Aspetta, aspetta, ora ni saluta, ora n’arricorda,… ma chì…?

A la fini salutaru a tutti, macari a li cani, macari a chidhi ca si truvavanu ddha pi sbaghiu, … e pi L’Àutra Sicilia mancu na palora di ringraziamenti pi tuttu chidhu ca, senza ajutu di nudhu, âmu fattu nna tutti sti anni pi la Sicilia e pi li Siciliani.

Chì facisti Bartolo, ti lu scurdasti? Li pulìtichi nun si scòrdanu mai nenti pi casu…

T’affrunti di la nostra amicizia? Allura picchì ni mmitasti?

Lu vidi li to “amici” comu ti tràttanu, nun vonnu ca ni mmiti, ma poi ti schifìanu lu stissu…

Li to “amici” si scàntanu di L’Àutra Sicilia, chistu è lu veru fattu! Tu po’ salutari lu parrinu, lu prufissuri chi si truvava ddha, lu to collaboraturi, picchì tutti chisti nun sunnu piriculusi, ma L’Àutra Sicilia no, chisti…, si pighianu campu…

O Âm’a pinzari ca ti scanti puru tu? E di chì? Si è veru c’avemu li stissi idei, qual è lu problema? Chi tu scighiisti un schieramentu pulìticu o un partitu ca secunnu nuàutri ‘un pòrtanu a nudha banna? Ma chista è tàttica, sulu tàttica,… si nun ci dividemu supra a li cosi mpurtanti…

Ma comunqui Bartolo, nuàutri ti vulemu sempri beni, puru ca tu ni facisti ssa mala parti pi daveru. Si tutti dicìssiru a li carusi e a li picciotti li cosi chi dici tu, già la Sicilia fussi “nàutra” Sicilia.

Accamora ognunu pi la so strata però…

Viva la Trinacria! Viva lu Vespru! Viva la Sicilia!

Fidiricu d’Aragona