Palermo, 6 giugno 2006

E’ un tema che taglia nella carne viva! non c’è niente di più sacro e “italiano” oggi della nazionale di calcio. Metterla in discussione, può sembrare come un sacrilegio, ma gli scandali e l’assenza di siciliani sono un’occasione per attaccare anche questo tabù; e poi, non diciamo che non si può tifare italia, solo gettiamo ombre e dubbi, gettiamo alienazione dall’identità italiana. Anche se ci linciano, resta un messaggio che prima era impossibile pronunciare. Da oggi in poi, tifare “azzurro” se una discussione di questa è lanciata, saprà un poco di retorico come gli altri simboli dell’italianità già tutti, più o meno, decrepiti.

Pi curiosità jivu a vìdiri di unni vinìanu li picciotti chi ni rapprisèntanu a sti mondiali e vitti ca nun ci n’è mancu unu sicilianu.

Mancu unu!

Ma chì stà succidennu a lu Pòpulu Sicilianu?

Un jornu dìcinu ca semu li chiù grossi di l’Italia, nàutru sentu ca ‘un avemu chiù un Totò Schillaci chi ni fa sunnari… Vo’ vìdiri ca c’è macari na custioni siciliana nna la ducazioni fìsica?

O puru lu fattu è ca nun ci sunnu li vivari di li picciotti o c’un funziònanu bonu…

Certu l’Italia è lu nostru statu e penzu ca li tanti Siciliani c’oji sunnu ‘n-Girmania ponnu vìdiri li vittorii di l’Italia comu na forma di riscattu; pi chistu penzu macari ca stu discursu nun s’av’a lèggiri comu na forma di antipatìa pi la nazionali…

Però lu pobrema c’è: macari nna lu palluni ‘n-Italia ‘un cuntamu nenti!

Ju nun m’abbilìu, penzu ca ci sunnu àutri pobremi chiù gravi, ma m’addumannu puru pirchì la Sicilia av’a èssiri sempri rapprisintata d’àutri nna sta schifìa di statu.

Chì ci fussi di malu si la Sicilia avissi na so nazionali comu ci l’avi la Scozia o lu Galles?

Nna lu Regnu Unitu ci sunnu quattru nazionali e quattru campionati e nudhu si ni scannalìa… Na vota puru in Italia ci n’èranu dui.

S’avìssimu na nostra nazionali, li calciaturi Siciliani s’attruvàssiru, s’avìssiru a truvari, comu s’attròvanu nna tutti li nazioni europei …

Po’ èssiri un sonnu, ma ju m’immàginu na Repùbrica Italiana cu tri nazionali: chidha taliana, chidha siciliana e chidha sarda. Pi mia li nazioni dintra a stu statu semu tri e tri avìssiru a èssiri li nazionali. Certu taliàssimu cu simpatìa macari a li cucini taliani e a chidhi sardi, ma lu cori n’avvampassi pi daveru sulu quannu li furii giarnu-russi scinnìssiru ‘n-campu. Jìssiru ‘n-celu sti me palori e sti me sonni!

Accamora ‘un c’è nenti di malu a tifari pi l’Italia, ma lassàtimi arristari friddu e ndiffirenti. Puru ca vulissi aviri anticchia ‘i simpatìa pi la squatra di lu me statu, c’è stu fattu c’un sèppimu mannàricci mancu ‘n-sicilianu e poi, nna lu palluni, oji èssiri talianu pari sulu èssiri na vriogna.

Chì vali ca li squatri di li citati siciliani chiù mpurtanti arristaru fora di lu scànnalu?

Chì vali si lu Missina era ammiscatu ma ‘n-posizioni subalterna a li ntiressi di li squatri forti d’Italia?

Li mmàgini boni di l’Italia nun sunnu pi la Sicilia ma chidhi tinti sì, chidhi ni li pighiamu. Nuàutri fomu sulu danniggiati di tuttu ssu discursu, però a l’èstiru lu fangu ni l’âmu a còghiiri. Armenu, si ci avissi statu un campionatu sicilianu a st’ura fùssimu fora di tutta ssa lurdìa…

Comunchi avemu ‘n-cori granni: la truvamu e la truvarremu sempri la forza d’abbattìricci li manu propiu a dha marrastra ca ni jittò fora di la casa nostra e di li nostri avi. E’ na custioni di puntighiu… o forsi, nanticchia, di gnuranza supra a la nostra vera identitati nazionali…

Ma allura, aspittannu lu jornu ca putemu aviri la “nostra” nazionali, jàmucci – si vulemu – na sti stadii a vidilla ssa nazionali senza siciliani, jàmuci e sustinèmula, pirchì accamora è chidha di lu nostru statu, ma sutta a la bannera taliana, pi favuri, attaccàmucci chidha siciliana e cu’ voli capiri capisci!

Fidiricu d’Aragona

ndr: in foto Alessandro Parisi. L’ultimo siciliano ad indossare la maglia azzurra della nazionale nell’amichevole Italia Finlandia giocata a Messina nel novembre 2004.