Palermu, 12/01/2006

A l’època d’oji si senti na granni cunfusioni quannu si parra di Sicilia e di Sicilianìsimu. C’è cu’ parra a propòsitu e cui a spropòsitu… Na vota li meghiu pulìtichi siciliani èranu quasi tutti d’accordu supra a li coordinati principali di la Custioni Siciliana e di comu la Sicilia s’aviss’avutu a rappurtari a la Penìsula taliana. Pi esempiu Michele Amari (oji ncinziatu macari di dhi ntillittuali mediocri c’un ànnu caputu quantu l’abbrazzu di l’Italia a’ statu asfissianti pi nuàutri) pubricau un “Catechìsimu di li Siciliani” unni la “Custioni” era simprificata cu dumanni e risposte fàcili.

Ju nun mi sentu a l’autizza di lu granni studiusu e stòricu sicilianu, però mi sentu di dari un cuntributu, macari nicu, a livari quarchi cunfusioni di mezzu. Ci pruvamu. Poi, macari, cu’ leggi, senza èssiri d’accordu d’un tuttu cu mia po truvari àutri risposti pirsunali a li stissi dumanni, e cu chistu avìssimu fattu macari cosa ùtili pi fari chiarizza…

Zoccu si’ tu?


Innanzi tuttu sugnu citatinu di lu munnu e arrispettu tutti ma la Patria, la me vera Patria, è la Sicilia.

Picchì dici ca la to Patria è la Sicilia e no l’Italia?


L’Italianu è la secunna me lingua, sugnu citatinu di la Repùbrica Taliana, ni rispettu la ligi e sentu ca la me identitati siciliana partècipa di na chiù granni identitati cumuni cu l’Italia, ma la Nazioni ‘un è un fattu sulu giurìdicu, è un fattu stòricu e pi chistu mi sentu di fari parti di na nazioni minuritaria (la Sicilia) dintra ‘n granni Statu (l’Italia).

Ma la storia di la Sicilia ‘un è na storia di na Rigiuni taliana?


Ma quannu mai! Forsi di lu 1860 a oji, e pi chistu arrispettu l’Italia, ma nzinu a tannu e di quannu la Sicilia trasìu nni la storia scritta (734 a.C. funnazioni di Naxos) Idha avìa statu sempri na Nazioni pi li so fatti, puru quannu avìa accuminciatu a usari l’Italianu comu lingua scritta nudhu pinzava ca la Sicilia putìa èssiri na “Rigiuni” di nàutru statu: Ciceruni dicìa “la Sicilia e l’Italia” e la Custituzioni di lu 1848 dicìa “La Sicilia sarrà sempri un statu ndipinnenti”, puru ca già la bannera era lu Triculuri talianu.

Ma la storia cancia sempri. ‘Un potti canciari macari chidha nostra?


Certu ca cancia. Ma ‘un si ponnu cancillari quasi trimmila anni comu si nenti fussi e, poi, vistu ca li risultati doppu 146 anni sunnu ca la Sicilia avi sempri na storia diversa, no ntigrata bona e mala cumminata nta la nazioni taliana, quarchi dubiu ca stamu sbaghiannu ora e no li trimmila anni prima è ligìttimu.

Ma ora c’è l’Europa, semu tutti Europei…


L’Europa è, nna lu stissu tempu, na granni civirtati e un matrimoniu di ntiressi. La “Nazioni europea” ‘un ci a’ statu mai, ne mai ci putirrà èssiri. Putemu èssiri d’accordu ca ni cummeni falla sta Cunfidirazioni, ma chissu è nàutru discursu; in ogni casu – pi mia – si facemu bonu li cunti, la Sicilia, rigiuni perifèrica senza rappresentanza diretta dintra a li Stituzioni Europei, ci perdi chiossai di chidhu chi ci vadagna a stari dintra a l’Europa.

Ma, lassannu pèrdiri la storia, la giografìa e tutti ss’àutri discursi ètnichi, pulìtichi, etc. a l’attu pràticu nun penzi ca l’Italia cura bonu li ntiressi di la Sicilia?


Assolutamenti No! Quarchi vota, pi sbaghiu, pi limòsina, quarchi beni arriva nzinu a cca, ma sta sucità di lu nicu cu lu granni funziona ‘n-modu ca li nostri esigenzi sunnu sempri l’ùrtimi a passari; sintenzia la saggizza popolari: Quannu lu nicu cu lu granni si menti a mala banna li vèrtuli appenni…


Anzi, peju, l’Italia a’ sempri cunzignatu lu guvernu e lu suttaguvernu di la Sicilia a na manata di latri e lagnusi chi pàssanu pi classi dirigenti e chi sèrvunu a tèniri bona la Sicilia: ‘un ni scurdamu ca prima di lu 1860 la mafia ‘un esistìa e ca prima di lu 1816 mancu esistìanu li “pre-mafii”, di “malantrini, spataioli, etc.”.

Vinennu a la cultura, tu penzi ca la Sicilia avi na cultura originali, tutta so?


Certu, avi na lingua! La so lingua, parrata cu certi varianti macari in Calabria e nna lu Salentu, è la chiù granni dimostrazioni ca esisti un pòpulu. Scusati, ma còmu fa a non èssiri un Pòpulu cu na so cultura originali, chidhu Sicilianu, quannu è certu ca avi na so lingua? E poi nun c’è sulu la lingua, ma li littri (in italianu e in sicilianu), l’arti, lu tiatru, lu manciari, l’usanzi, li modi di diri, li gesti, nzumma… sulu cu’ nun lu voli vìdiri nun li vidi c’avemu na cultura nostra.

Ma ssa cultura ‘un po èssiri addifinnuta e sviluppata dintra a l’Italia?


In teorìa sì, in pràtica li stituzioni taliani ànnu fattu sempri tuttu p’ammucciari la Sicilia e lu Sicilianu a li Siciliani, pi fàrinni lu lavaggiu di cirivedhu, pi fàrinni scurdari tuttu e azzerari la nostra identitati, accuminciannu di la Scola, chi servi pi la formazioni di li novi generazioni, e arrivannu a la TV, chi trasi nna la nostra vita e nna la nostra menti senza mancu ca ni n’addunamu.

Ma è propiu accussì mpurtanti parrari ‘n-Sicilianu? ‘Un putemu addifèniri li nostri diritti lassannu pèrdiri sta diffìcili redità?


Cca fazzu rispùnniri a Buttitta: UN POPULU E’ PERSU, PERSU PI SEMPRI, QUANNI CI LEVANU LA LINGUA ADDUTTATA DI LI PATRI. Ma voghiu jùnciri un pinzeru miu: ‘un è tantu mpurtanti “parrari” ‘n-Sicilianu, è mpurtanti “scrìviri” ‘n-Sicilianu. Pi sèculi li nostri avi parràvanu ‘n-Sicilianu e si sfurzàvanu di scrìviri in italianu; ora vinni l’ora di fari a riversa, picchì la nostra storia dimostra ca lu scrittu, prima o poi, vinci supra a lu parratu.

Nzumma, ma tu propiu ‘un vo salvari nenti di st’Italia? Ma ci sarrà quarchi cosa bona ca ni fici ?…

Certu, ci sunnu tri cosi ca n’attàccanu:


– Primu, la lingua taliana è “macari” nostra: taghiari la Sicilia di l’Italia signìfica lassalla chiù sula e poi li legami cu l’Italia, specialmenti chidha meridionali e la Calabria sunnu troppu forti pi niscirinninni senza dannu morali e materiali;


– Secunnu, bonu o malu, nzèmmula a l’Italia la Sicilia canuscìu la libirtà e la democrazìa, chistu ‘un voli diri ca senza l’Italia turnàssimu a l’Anticu Rigimi, ma certu âm’a ricanùsciri stu dèbitu stòricu;


– Terzu, lu statu di fattu è statu di fattu, cu’ voli canciari li confini di statu è eversivu e terrorista, e ju nun mi la sentu di arrivari nzinu a chistu, l’esempiu di l’Àutu Àdigi dimostra ca si po arristari dintra a un statu senza èssiri assimilati.

Mi pari di capiri ca, a l’urtimata, si’ autonomista, ma allura ti stannu boni li cosi comu su’?


No! Picchì l’Autonomìa, accussì com’è, ‘un m’abbasta e ‘un serv’a nenti e poi picchì chidha stissa chi c’è è sulu nna la carta e ‘un a’ statu mai appricata.

Ma nzumma qual è lu pobrema secunnu tia?


Ju dicu ca la Sicilia avi na so identitati di Nazioni (o di quasi-nazioni si vuliti, ma cancia picca), ca avi ntiressi so, cuntrastanti assai spissu cu chidhi di l’Italia, ca ci cummeni arristari ìsula picchì chistu ‘un a’ fattu mai mali a nudhu (àutru chi ponti…), e, dunca, pi tuttu chistu, avi bisognu d’aviri risurvuta la so stòrica “Custioni” ca è sutta a l’occhi di tutti, pi lu disagiu econòmicu, sociali, culturali e pulìticu chi ni veni…

E tu còmu facissi pi risòrviri ssa “Custioni”?


Intantu catalogannu li risposti. Ci sunnu, nfatti, li seguenti atteggiamenti:


– unitariu, cintralista o rigiunista;


– autonomista;


– fidiralista;


– cunfidiralista;


– ndipinnentista;


– siparatista.


Tranni lu primu, tutti l’àutri sunnu formi ligeri o pisanti di “Sicilianìsimu”.

Cùi è “unitariu”?


Chidhu ca penza ca li pobremi di la Sicilia si risòrvunu livannu a la Sicilia ogni spicialità: na vota st’atteggiamentu era cuntrariu macari a la stituzioni di li rigiuni, ora ca ci sunnu ‘n-tutta Italia, s’accèttanu, ma menu cuntanu è meghiu è… Pi tuttu chidhu ca dìssimu lu cintralìsimu (ufficiali prima di lu 1946, de facto doppu) servi sulu a tèniri la Sicilia comu colonia di l’Italia comu era a li tempi di la monarchìa di Savoia.

Cùi è “autonomista”?


Chihdu ca penza ca la Sicilia avi bisognu di n’autonomìa spiciali, ma lu penza suprattuttu pi frinari li tendenzi “separatisti” e pi lu restu s’accuntenta di chidhu chi c’è. Ju penzu ca n’Autonomìa accussì è sulu un ostàculu a lu sviluppu di la Sicilia.

Cùi è “fidiralista”?


Chidhu ca penza ca la Rigiuni s’av’a chiamari “statu” e ca tutta l’Italia s’av’a organizzari daccussì. Di sòlitu, darreri a lu fidiralìsimu (a lu Sud, almenu) ci sunnu cristiani ca vonnu veramenti fari funzionari l’Autonomìa. Ma lu fidiralìsimu, comu è predicatu e praticatu oji, avi du’ punti dèbuli:


– ntantu, spissu macari si no sempri, è na “màscara” p’ammucciari lu razzìsimu nordista e l’egoìsimu contra a lu Sud, fidiralìsimu senza ridistribuzioni di risorsi di li ricchi a li pòviri è peju di la ndipinnenza;

– e poi lu fidiralìsimu annulla la spicialità di la Sicilia e daccussì riporta competenzi a lu centru e ‘un avemu nudhu vantaggiu di èssiri chiamati “statu” anziché “rigiuni” si poi li dicisioni chi cùntanu si pighianu arreri a 1000, 1500 km di distanza di la nostra ìsula.

Cùi è “cunfidiralista”?


Ju sugnu cunfidiralista, e sugnu ‘n-cumpagnìa bona (Ruggero Settimo, Francesco Ferrara, Michele Amari, Vito D’Ondes Reggio,…) ma accamora ‘un voghiu parràrinni, jamu avanti.

Cùi è “ndipinnentista”?


Chidhu chi voli la ndipinnenza di lu Statu Sicilianu. E’ la posizioni di lu Fronti Nazionali Sicilianu, di lu Partitu Nazionalista Sicilianu e d’àutri ntillittuali. Sunnu pirsuni serii, ma pi tuttu chidhu chi dìssimu, oji sarrìa un erruri. Nun mi pari na strata chi spunta.

Cùi è “siparatista”?


Chidhu ca nun sulu voli la ndipinnenza, ma macari ‘un voli aviri nenti a chi spàrtiri cu l’Italia. E’ chidhu chi “odia” l’Italia, chi – si putissi – a lu Strittu ci mittissu lu filu spinatu, chi sonna na Sicilia nun sulu fora di l’Italia, ma quasi fora di lu munnu, un portu “OFF SHORE” unni si po fari zoccheghiè.

Certuni di chisti, tantu sunnu disfiziati di l’Italia ca mancu vonnu aviri la stissa riligiuni e pi chistu, macari, si fannu musulmani. E’ n’atteggiamentu chi nasci di lu sonnu e di la frustrazioni, nun manca di aviri spunti romàntichi di riscattu, ma – pi daveru cu tuttu lu rispettu – fa chiù malu chi bonu a la nostra granni causa. Anzi fussi na disgrazia si tutti chidhi ca crìdunu nna la Sicilia fùssiru siparatisti: tannu, veru ‘un ci fussi chiù nenti di spirari.

Ma ssu cunfidarilìsimu esattamenti in chì cunzisti?

E’ la risposta chiù coerenti a la Custioni Siciliana.
S’idhu esisti na specificità siciliana ‘un si po chi èssiri Sicilianisti. Lu Sicilianìsimu av’a èssiri la bannera cumuni di tutti, quali chi sia la nostra formazioni (socialista, virdi, cunzirvaturi, libirali, cattòlicu militanti,…).

Pi èssiri effettivu stu Sicilianìsimu av’a èssiri amministratu di partiti siciliani. Lu peju erruri ca pòttiru fari li Siciliani fu chidu di dàri la propia autonomìa (spiciali), ‘n-manu a partiti taliani chi pighianu òrdini di fora; partiti ca “ni fìciru ligna”…

Poi, la nostra Autonomìa è già cunfidirali (ci manca lu nomu di “Statu”?, e mittemuccillu!) picchì nascìu d’un pattu tra lu Pòpulu Sicilianu e l’Italia e picchì disegna ‘n ordinamentu “rigiunali” siparatu quasi d’un tuttu rispettu a chidhu talianu.


La Cunfidirazioni è chidha unni lu “Statu di Sicilia”, guvernatu di partiti siciliani, duna quarchi cumpitenza a lu Statu talianu, secunnu una carta custituzionali ca è puru un trattatu ntra du’ stati suvrani, e cu’ na corti “terza” ca dicidi quannu c’è cunfrittu tra la Sicilia e l’Italia. E pi lu restu la Sicilia E’ LIBIRA! Po fari zoccu voli, po mèttiri li tassi chi voli, si teni lu so pitroliu e lu so gassi, s’organizza la so scola, li so servizi pùbrici, cummatti la dilinguenza e la mafia, parra la so lingua, fa la so pulìtica nnustriali pi fari arristari in patria li Siciliani, ajuta la ricerca e l’università, si junci direttamenti cu l’àutri paisi di lu munnu senza passari sempri di la Penìsula, si fa li so banchi, la so bursa, li so aèrei e li so assicurazioni, senza fàrisi pilotari di li lobby taliani, nzumma è quasi ndipinnenti…

Ma cù’ n’assicura ca ssa Sicilia nun facissi la fini di chidha autònoma?


La responzabilità. Di lu centru pìcciuli ‘un avissir’ad arrivari chiù: sulu un funnu pi li diritti mìnimi di cittadinanza e nàutru pi li nfrastrutturi (tipu chidhu di l’art.39), a parti di quarchi accordu tranzitoriu pi la massa di li pricarii.


Pi lu futuru la Sicilia av’a caminari sula, … però, sula, po fari zoccu voli, ‘un s’av’a ammiscari nudhu supra a li nostri ligi… mancu l’Europa. Anzi, macari, s’avissi a studiari si la Sicilia, la sola Sicilia, putissi nèsciri di stu càrciri e fàrisi na munita propia…

E chì lassassi a l’Italia?


La difesa (cu li casermi), la granni pulìtica estera, l’ordinamentu di la polizìa, la giustizia, li diritti funnamintali di lu citatinu, l’ordinamentu funnamintali di la scola e di quarchi àutru sitturi mpurtanti, lu dirittu civili e picca àutru. Nna l’àutri custioni, li diputati e li sinaturi eletti in Sicilia, manc’avissir’a vutari.

E allura sutta sutta un pocu siparatista ci si’ ?!


No! Picchì chidhi ca vonnu cosi c’un si ponnu rializzari a la fini ‘un ànnu nenti e picchì ju nun mi voghiu siparari di nudhu: ju voghiu beni a l’Italia, a la so canzuna, a la so arti,… L’odiu nun sulu gènera viulenza ma puru m’arricorda li picciridhi: p’idhi c’è sulu lu biancu e lu nìuru, poi, quannu si crisci, si capisci ca la vita è complessa e ca cu la complessità âm’a vìviri e suffriri.
Veramenti la veri rivoluzioni va fatta cu la testa e no sulu cu lu cori o cu li vrazza; pi chistu, parafrasannu un rivoluzionariu di lu Novicentu, pozzu cunchiùiri dicennu ca “Lu Siparatìsimu è la malatìa nfantili di lu Sicilianìsimu”.

Ci fùssiru ‘n saccu d’àutri cosi di diri ma lu concettu funnamintali mi pari ca niscìu di tuttu stu discursu.
Accamora, Benedica a Tutti.

Fidiricu d’Aragona