Palermu, 21 Nuvèmmiru 2005

Cu stu cumunicatu mi dicisi d’accuminciari a scrìviri quarchi cosa pi L’Àutra Sicilia spirannu di fari cosa ùtili.

E’ veru! N’âm’a spicciari a muvìrinni pi sta Sicilia si vulemu sarbàrinni n’anticchiedha pi li futuri generazioni.

Nna pochi jorna àppim’a sèntiri tri mali nutizii.

Unu: ca li cumuni siciliani assùmunu genti senza fari cuncursi (fannu finta ca l’assùmunu li societati misti chi sunnu privati nna la forma ma pùbrichi nna la sustanza) e facennu, nna lu stissu tempu, nciustizia a li disoccupati e aggraviu pi la finanza pùbrica.

Dui: ca l’ENEL ci livau la luci elèttrica a la Cumuni di Castrugiuvanni, doppu tuttu chidhu ca n’arrobba francu stu monopolista garantutu di lu Statu talianu, a nuàutri chi la luci la pruduciemu, a nuàutri chi l’energia l’avemu e l’arrialamu.

Tri: ca lu “Prisidenti” dissi ca la Sicilia avi bisognu di li vrazza d’àutri mmigrati, ca n’âm’a fari vèniri chiossai, c’un n’abbàstanu sti sbarchi di mighiara di dispirati, mentri di li vrazza nostra no, ‘un avi di bisogno, nuàutri putemu cuntinuari a jirinninni pi sempri…

Ognunu pinzassi zoccu voli. Ju penzu ca la Sicilia è abbannunata…

Ma penzu macari ca nun c’è chiù tempu di pèrdiri.
Semu na Nazioni! Sulu si n’arruspighiamu e ni cummincemu di chistu putemu aviri na spiranza.

Viva lu Vespru! Viva la Trinacria! Viva la Sicilia!

Fidiricu d’Aragona